मुकुन्दलाई देखाएर एमालेले हटायो ७० वर्षे उमेर हद, अब वामदेव पनि जालान् ?

एमालेमा आठौँ महाधिवेशनदेखि सुरु भएको ७० वर्षे उमेर हद हटाइएको छ । तत्काललाई नेकपा एकीकृत समाजवादीतर्फ गएका नेता मुकुन्द न्यौपानेलाई पार्टीमा भित्र्याउन सो प्रावधान निलम्बन गरिएको भनिए पनि एमालेले विधान महाधिवेशनमा लगेर उमेर हद हटाउने तयारी गरेको छ ।

१९ जेठ शुक्रबार बसेको सचिवालय बैठकले उमेर हद निलम्बन हटाएर ७२ बर्षिय न्यौपानेसहित नेताहरुलाई केन्द्रीय सदस्य मनोनित गरेको थियो । एमाले विधानले पार्टी पदाधिकारी, केन्द्रीय सदस्य लगायत कार्यकारी पदमा रहन ७० वर्षे उमेर हद तोकेको छ । अध्यक्ष केपी शर्मा ओलीलाई सहज बनाउन विधान महाधिवेशनले थप व्याख्या गर्दै ७० वर्ष पूरा नहुँदै निर्वाचित वा मनोनीत भएको व्यक्तिले अर्को महाधिवेशन, अधिवेशन नभएसम्म आफू निर्वाचित वा मनोनीत पदमा रही जिम्मेवारी बहन गर्न बाधा नपुग्ने प्रावधान राखियो । त्यसले ११ फागुनमा ७० वर्ष पुग्न लागेका ओली मंसिरमै पाँच वर्षका लागि अध्यक्ष निर्वाचित भए ।