संसदीय सुनुवाइका लागि नाम पठाइयो

काठमाडौँ, साउन २२ गते । संवैधानिक परिषद्ले प्रस्तावित प्रधान न्यायाधीश विश्वम्भरप्रसाद श्रेष्ठको नाम संसदीय सुनुवाइका लागि पठाएको छ । परिषद्ले सुनुवाइ प्रक्रियाका लागि संसदीय सुनुवाइ समितिमा नाम पठाएको हो । परिषद्को पत्राचार अनुसार समितिले प्रारम्भिक बैठक मङ्गलबार बोलाउने तयारी गरेको छ । उक्त बैठकबाट प्रक्रिया थालनी गर्दै श्रेष्ठविरुद्ध उजुरी आह्वान गर्ने तयारी छ ।

सङ्घीय संसद्का प्रवक्ता एकराम गिरीले प्रस्तावित प्रधान न्यायाधीशको नाम सुनुवाइका लागि प्राप्त भएको बताउनुभयो । उहाँले भन्नुभयो, “सुनुवाइका लागि पत्राचार भइसकेको छ । समितिले सम्भवतः मङ्गलबारबाट प्रक्रिया आरम्भ गर्ने छ ।”