बढ्दो जनसङ्ख्यालाई पर्याप्त स्वच्छ पानी, ऊर्जा र खाद्यान्न पुर्‍याउनु चुनौतीपूर्ण

काठमाडौं : विश्वभर बढिरहेको जनसङ्ख्यालाई पर्याप्त स्वच्छ पानी, ऊर्जा र खाद्यान्न पुर्‍याउने काम चुनौतीपूर्ण बन्दै गएकोप्रति विज्ञहरूले चिन्ता व्यक्त गरेका छन्। राजधानीमा आयोजित दुईदिने पानी, ऊर्जा र खाद्यान्न अन्तरसम्बन्ध विषयक कार्यशालाका वक्ता तथा प्रस्तोताले पानीको पर्याप्त व्यवस्थाका लागि सोच्नुपर्ने बेला भएको आवश्यकता औँल्याइएका हुन्।

खानेपानी सचिव मणिराम गेलालले बढ्दो शहरीकरण र जनसङ्ख्याको वृद्धिले संसारभर खानेपानी, ऊर्जा र खाद्यान्नको माग बढिरहेको बताए। स्वच्छ खानेपानीको स्रोत सीमित भएकाले अभाव देखिएको र तिनको समयमा नै संरक्षण गर्नुपर्ने आवश्यकता उनले औँल्याए।