दसैँ : कोही टन्न खाँदै, कोही भोकभोकै रन्थनिँदै

यतिखेर सबैतिर दसैँको रौनकता छाएको छ । घरघरमा मिठामिठा परिकार पाकेका छन्, परिवारजन र आफन्त मिलेर रमाइलो गरिरहेका छन् । हरेक ठाउँमा किनमेल गर्नेको भीड छ । पैसा हुनेहरूका निम्ति दसैँ खुसीयाली लिएर आएको छ । तर, पैसा नहुने के दसैँ के चाडबाड ? कोही टन्न खाएर रमाइलो गरिरहेका छन् भने कोही भोको पेट बाटोमा मागिरहेका छन् ।

चाडबाड आएपनि उनीहरूलाई केही फरक परेको छैन । बिहानदेखि सडक छेउछाउ मागेर बस्छन् । दिए खान्छन् नदिए भोकभोकै बस्छन् । खुट्टामा एकजोर चप्पल छैन नयाँ लुगाको त कुरै छोडौँ । दसैँको मुखमा समेत घरघरमा माग्न हिँडेका छन् । दसैँमा घरघरमा खसी काटिन्छ । नयाँ लत्ताकपडा, गाडी किन्नेलगायत घरमा आवश्यक पर्ने सामान किन्ने पैसा हुन्छ ।