चुनावी चुनौती थपिँदै, चापमा आयोग

काठमाडौं । अन्तरिम सरकारद्वारा घोषित प्रतिनिधिसभा निर्वाचन नेपाली कांग्रेस विभाजनसहितका कारण थप जोखिममा परेको विश्लेषण हुन थालेको छ । प्रत्यक्षतर्फको उम्मेदवारी दर्ता गर्ने दिनको सँघारमा आइपुग्दा देशकै लामो इतिहास बोकेको एउटा ठूलो पार्टीको राजनीतिक अन्यौलताले गर्दा निर्वाचनमा असर पर्ने विश्लेषण भएको हो ।

नेपाली कांग्रेसको दोस्रो विशेष महाधिवेशनलाई आफूहरूले ‘नचिन्ने’ भन्दै निर्वाचन आयोगमा कायम दलले जानकारी गराएर कार्यसमितिको बहुमतले वैशाखमा महाधिवेशन गर्ने निर्णयसमेत गरेको विषयले कांग्रेस विभाजित भइसक्यो । महाधिवेशनबाट निर्वाचित गगन थापा नेतृत्वको नेपाली कांग्रेस र साबिक शेरबहादुर देउवा नेतृत्वको नेपाली कांग्रेसले अलग अलग दाबीसहित ‘आफू आधिकारिक भएको’ अडान राख्न थालेपछि यसको आधिकारिकता टुंग्याउनेदेखि अगाडिका उपाय पहिल्याउनेसम्म चाप निर्वाचन आयोगमा थपिएको छ ।