खालिस्तानी अगुवा नेपालबाट पक्राउ परेको भारतीय मिडियाको दाबी, नेपाल प्रहरी ‘बेखबर’

काठमाडौं । ‘खालिस्तानी समूह’ का नामले चिनिने भारतीय शिख पृथकतावादी आन्दोलनका एक अगुवालाई नेपाली भूमिबाट भारतको केन्द्रीय जाँच एजेन्सी (एनआईए) नियन्त्रणमा लिएको भारतीय मिडियाको दाबी छ । तर, नेपाल प्रहरी यसबारे बेखबर छ ।

बलवीर सिंह भनिने कश्मीर सिंह गलबड्डीलाई भारतको केन्द्रीय जाँच एजेन्सी (एनआईए) को टोलीले गत शनिवार नेपालबाट पक्राउ गरेर लगेको समाचार दिल्लीबाट सञ्चालित अंग्रेजी न्युजपोर्टल द इण्डियन एक्सप्रेससहितका मिडियाले केन्द्रीय जाँच एजेन्सी (एनआईए) को हवाला दिँदै सम्प्रेषण गरिरहेका छन् ।

नेपाल प्रहरीका केन्द्रीय प्रवक्ता एसएसपी रमेश थापाका अनुसार ती व्यक्ति नेपालमा रहेको कुरादेखि पक्राउ परेकोसम्मका विषयबारे नेपाल प्रहरी जानकार छैन । नेपाल प्रहरीका विभिन्न युनिटले देशका विभिन्न भागमा शंकास्पद व्यक्तिहरूको आवतजावत हुनसक्ने कुराको नियमित निगरानी राखिरहने बताउँदै प्रवक्ता थापाले भने, ‘न हाम्रो देशमा त्यस्तो मान्छे आएको थाहा छ, न कसैले लिएर गएकै थाहा छ ।’

एनआईएद्वारा नियन्त्रणमा लिएको भनिएका सिंह पन्जाबस्थित नाभा जेलबाट अन्य दुई बन्दीसँगै फरार व्यक्ति हुन् । नेपालका फरक फरक शहरमा कपडा व्यवसाय गर्ने आवरणमा सञ्चालित खालसा इन्टरनेशनल नामक आतंककारी समूहसँग सिंह सम्बद्ध रहेको भारतीय मिडियाहरूको दाबी छ ।

उनले नेपालका विभिन्न ६ वटा बैंकमा खाता खोलेको र क्यानडाबाट आर्थिक कारोबार हुने गरेको दाबी गरिएको छ । त्यसरी गरिएको आर्थिक कारोबार भारतमा आतंककारी गतिविधि सञ्चालनमा प्रयोग भएको भारतीय मिडियाले उल्लेख गरेका छन् ।

बलवीर सिंहलाई पक्राउका निम्ति देखाइदिने व्यक्तिलाई एक लाखको पुरस्कार घोषणा गरिएको थियो । पन्जाब पुलिसको इन्टेलिजेन्स मुख्यालयमा भएको आतंककारी हमलाका मुख्य योजनाकार बलवीर नै थिए ।

यद्यपि, नेपालका कुनै पनि बैंक तथा वित्तीय संस्थाका सम्पूर्ण आर्थिक कारोबारलाई नेपाल राष्ट्र बैंकमा रहेको वित्तीय जानकारी इकाईले नियमित अनुगमन गरिरहेको हुन्छ । उक्त इकाईले मङ्गलवार मात्रै प्रहरीको केन्द्रीय अनुसन्धान ब्युरो (सीआईबी) का प्रमुख एआईजी चद्रकुवेर खापुङसहितका पदाधिकारीसँग अन्तर्क्रिया गरेको थियो ।

बलवीर पक्राउ र उनको आर्थिक कारोबारबारे नेपाल प्रेसले एआईजी खापुङलाई जिज्ञासा राख्दा हालसम्म त्यस्तो कुनै गतिविधि र घटनाको जानकारी नभएको बताए ।

‘एउटा विदेशीले नेपालका ६ वटा बैंकमा खाता खोल्ने र विदेशी मुद्राको कारोबार गर्ने कुरा नेपालमा सजिलो कुरा होइन, यदि त्यस्तो भएको भए त्यस्तो व्यक्ति त्यतिबेलै पहिचान भइसक्थ्यो’, उनले भने ।

यद्यपि, नेपाली नागरिकको प्रयोग गरेर वा अन्य कुनै किसिमले त्यस्ता गतिविधि भएका छन् भने आफूहरूले गम्भीर अध्ययन गर्ने उनले बताए ।