शरद्कालीन सिजनमा ४९ हिमाल चढ्न १२ सयले लिए अनुमति

शरद्कालीन सिजनमा हिमाल आरोहणका लागि अनुमति लिने स्वदेशी तथा विदेशी आरोहीको संख्या एक हजार १ सय ८५ पुगेको छ । अहिलेसम्म ७२ देशका आरोहीले विभिन्न ४९ हिमाल आरोहणका लागि पर्यटन विभागबाट अनुमति लिएका हुन् । २५ अक्टोबरसम्म आरोहणको अनुमति लिनेमा दुई सय ३७ महिला आरोही रहेका छन् ।

शरद् सिजनमा हिमाल आरोहणका लागि सबैभन्दा धेरै अमेरिकी नागरिकले अनुमति लिएको पर्यटन विभागले जनाएको छ । विभिन्न हिमाल आरोहणका लागि हालसम्म एक सय २१ अमेरिकी आरोहीले अनुमति लिएका छन् । यस सिजनमा सबैभन्दा बढी आकर्षण आमादब्लम (६,८१४ मि.) र मनास्लु (८,१६३ मि.) हिमाल आरोहणका लागि देखिएको छ । आमादब्लम चढ्न विभिन्न देशका चार सय नौ र मनास्लु चढ्न तीन सय एक आरोहीले अनुमति लिइसकेको विभागले जनाएको छ ।