कोशीको बजेटमा सत्ता गठबन्धनबीच खटपट, आफ्नै सांसदको असन्तुष्टिले सरकार दबाबमा

विराटनगर । कोशी प्रदेश सरकारको आर्थिक वर्ष २०८३/८४ को बजेटले सत्ता गठबन्धनभित्रै गम्भीर असन्तुष्टि चुलिएको छ। बजेटलाई लिएर सत्तारूढ नेकपा (एमाले) र नेपाली कांग्रेसकै सांसदहरूले खुलेर असन्तुष्टि जनाएपछि प्रदेशसभा बैठक पटक-पटक स्थगित हुन पुगेको छ भने सरकारमाथि बजेट संशोधनको दबाब बढेको छ।

असार १ गते आर्थिक मामिला तथा योजनामन्त्री विदुरकुमार लिङ्थेपले ४० अर्ब ४४ करोड ९८ लाख रुपैयाँको बजेट प्रदेशसभामा प्रस्तुत गरेका थिए। तर बजेट सार्वजनिक भएलगत्तै सत्ता पक्षकै सांसदहरूले मुख्यमन्त्री हिक्मतकुमार कार्की र केही मन्त्रीका निर्वाचन क्षेत्रलाई प्राथमिकता दिइएको आरोप लगाउँदै विरोध जनाएका हुन्।