सामर्थ्य बढाऔं, विकासशील राष्ट्र बनौं

नेपाल अतिकम विकसित राष्ट्र हो। अब भने विकासशील राष्ट्रमा स्तरोन्नति हुनेवाला छ। अतिकम विकसित अर्थात् गरिब राष्ट्र हुनुको भोगाइ आफ्नै ठाउँमा छ। विकासशील राष्ट्रमा स्तरोन्नति हुँदैमा के हुन्छ ? सर्वसाधारणको साधारण प्रश्न हुनु स्वाभाविक हो। तर त्यसका अन्तर्राष्ट्रिय आयामहरू छन्।

विज्ञहरूकै मत पनि यसमा परम्पर रूपमा भिन्न छ। कसैले स्तरोन्नति नगर्नु फाइदाजनक भन्छन् त कसैले स्तरोन्नति हुनुपर्छ भन्छन्। साधारण भाषामा भन्दा राष्ट्र गरिब सूचीमा बस्नु हुँदैन। अतिकम विकसित हुनु हुँदैन। नेपाली जनताले चाहेको पनि नेपाल विकसित राष्ट्र होस् भन्ने हो। तर चाहेर हुँदैन वास्तविक रूपमै मापदण्ड पूरा हुनुपर्छ। विकासशील राष्ट्र बन्न संयुक्त राष्ट्रसंघीय समितिले तय गरेका मुख्य आधारमा नेपाल उक्लिसकेको छ। त्यसै आधारमा आउँदो तीन वर्ष अर्थात् सन् २०२६ मा नेपाल विकासशील राष्ट्रको सूचीमा दर्ज हुँदैछ।