सरकारको भाष्यसँग सहमत छैनन् ‘टिकटक स्टार’

काठमाडौं । सरकारकी प्रवक्ता एवं सञ्चार तथा सूचना प्रविधिमन्त्री रेखा शर्माले प्रतिबन्धको निर्णय सुनाइरहँदा कञ्चनपुरका अंशुराज बर्मा टिकटक लाइभमा थिए । उनका लागि यो ‘स्तब्ध’ पार्ने खबर थियो, जुन कुरा उनले लाइभबाटै थाहा पाए । ‘टिकटक स्टार’का रुपमा उनको पछिल्लो लाइभ कात्तिक २७ गते बेलुकासम्म रह्यो । सिंहदरबारले यो छोटो भिडियो एपमा रोक लगाएपछि बर्मा त्यसयता लाइभमा छैनन् ।

दैनिक १२-१३ घण्टा लाइभ बस्ने बर्मासँग वर्षमा डेढ करोड रुपैयाँ कमाइ गरेको हिसाब छ । उनले यो आम्दानी असहाय, अनाथ, विद्यालय र भूकम्प पीडितलाई खर्चिएका छन् । त्यही पैसाले उनी यतिबेला विद्यालय बनाउन जुटेका छन् । गत वर्ष अनलाइनखबरसँग कुरा गर्दै बर्माले भनेका थिए, म पैसा कमाउन टिकटक चलाउँछु । टिकटक सधैं रहन्छ भन्ने छैन । यसको सदुपयोग गर्छु र अरुको लागि प्रेरणाको स्रोत बन्छु ।’