राजस्व छली गम्भीर अपराध

हामीकहाँ राजस्व छलीका घटनाहरु नयाँ होइनन् । कुशासन मौलाइरहँदा राजस्व छलीका घटनाहरु बढी हुने गर्छन् । सरकारी निकायहरुले राजस्व छलीलाई निस्तेज पार्नुपर्नेमा त्यस्तो गर्न सकेका छैनन् । सरकारलाई बुझाउनुपर्ने राजस्व कम बुझाउने वा नबुझाउने नियतले ट्याक्स प्लानिङ गर्ने, राजस्व नबुझाउने वा कम बुझाउने हिसाबले कागजात पेस गरेर ट्याक्स छल्ने काम बढी हुने गरेको छ । राजस्व चुहावटसम्बन्धी कसुर लाग्ने कानुन भए पनि सो कानुनको सशक्त कार्यान्वयन हुन सकेको छैन । पछिल्लो समयमा राजस्व अनुसन्धान विभागले राजस्व छली गर्नेहरुविरुद्ध मुद्दा दायर गर्ने काममा सुस्तता आएको छ । यसले विभागको कामकारबाहीप्रति आशंका पैदा हुन थालेको छ । ६१ किलो सुन तस्करी प्रकरणमा कारबाही गरेर चर्चामा आएको राजस्व अनुसन्धान विभागले आफ्नो अन्य नियमित कार्य प्रभावकारीरुपमा गर्न नसक्नु दुःखद छ । विभागले राजस्व छलीका घटनाहरुमा निष्पक्षपूर्वक छानबिन गरी दोषीमाथि कारबाही गर्ने परिपाटीलाई निरन्तरता दिन सक्नुपर्छ ।

राजस्व चुहावट गरी राजस्व ठगी गर्नेहरुलाई राष्ट्रिय अपराधीकै रुपमा लिनृुपर्छ । यस्ता अपराधीहरुलाई कुनै पनि बहानामा छुट दिनुहुँदैन । राजस्व कार्यालय तथा भन्सार कार्यालयमा काम गर्ने कर्मचारीहरु इमानदार र पारदर्शीमात्रै बन्न सके भने पनि धेरै हदसम्म राजस्व उठ्ने क्रममा वृद्धि आउने निश्चित छ । तर कर्मचारीहरुले व्यक्तिगत स्वार्थ र आर्थिक लाभमा ध्यान दिँदा उनीहरुबाट बद्मासी हुने क्रम बढ्दै गइरहेको छ । आन्तरिक राजस्व कार्यालय, भन्सार कार्यालयलगायतका कर्मचारीहरुको व्यापारीहरुसँगको अघोषित सम्बन्धका कारण पनि अनियमितता हुने क्रम बढिरहेको छ ।