पार्टी गठनको वर्ष दिन नपुग्दै माओवादी केन्द्रसँग एकता गर्न माधव नेपाल तयार, एकीकृरणका लागि के-के भयो?

काठमाडौं : पार्टी गठनको एक वर्ष नपुग्दै नेकपा (एकीकृत समाजवादी), नेकपा (माओवादी केन्द्र) सँग एकताका लागि तयार भएको छ। २०७८ भदौ ९ गते निर्वाचन आयोगबाट दलको मान्यता पाएको एकीकृत समाजवादी गत वर्ष एमालेबाट विभाजन भएर नयाँ दल बनेको थियो।

माधवकुमार नेपाल नेतृत्वको एकीकृत समाजवादी मंसिर ४ गते हुने प्रदेश तथा प्रतिनिधि सभा निर्वाचनको मुखमा माओवादीसँग मिल्न तयार भएको नेताहरुले बताएका छन्। बुधबार एकीकृत समाजवादीको सचिवालयको बैठकले एकताको विषयलाई औपचारिकता दिएको छ। एकता वार्ता संयोजन समिति बनाएर जाने सचिवालयको बैठकमा निर्णय भएको हो। माओवादी केन्द्रको मंगलबारको स्थायी कमिटीको बैठकले पनि एकीकृत समाजवादीसँग एकता गर्न एकता संयोजन समिति बनाउने सहमति गरेको थियो। मंगलबार नै माओवादी केन्द्रका अध्यक्ष षुष्पकमल दाहाल प्रचण्डले नेपाल समाजवादी पार्टी (नेसपा) का अध्यक्ष बाबुराम भट्टराई र आफू एक ठाउँमा उभिएको भन्दै नेपालसँग पनि छिट्टै एकता हुने बताएका थिए।