कालीगण्डकी लोकमार्गः फलेबास–अर्मादी खण्ड स्तरोन्नति सुरु

पर्वत । लामो समयदेखि अलपत्र बनेको निर्माणाधीन उत्तर–दक्षिण जोड्ने राष्ट्रिय गौरवको कालीगण्डकी लोकमार्गको पर्वत खण्डमा पर्ने फलेबास–अर्मादी सडक स्तरोन्नति सुरु भएको छ । सङ्घीय सरकारको सहयोगमा फलेबास नगरपालिका–६ ढिकबाट कुश्मा नगरपालिका–४ अर्मादीसम्मको सडक स्तरोन्नति सुरु भएको हो ।

कालीगण्डकी लोकमार्ग आयोजना कार्यालय पाल्पाका अनुसार गत कात्तिक २१ गते ठेकेदार कम्पनीसँग सम्झौता भई सडक स्तरोन्नति तीव्र गतिमा भइरहेको छ । सडक स्तरोन्नतिसहित कालोपत्रे गर्ने जिम्मा नवकान्तिपुर मैनाचुली, नाना जेभीले पाएको छ । उक्त कम्पनीसँग रु ६५ करोड ६१ लाख ८३ हजार १२८ मा सम्झौता भएको जनाउँदै ३६ महिनाभित्र निर्माण सम्पन्न गरिसक्नुपर्ने सम्झौतामा उल्लेख गरिएको आयोजनाका इन्जिनियर पिपुल गौतमले जानकारी दिए ।