सबैभन्दा ठुलो विदेशी लगानीमा स्थानीयको अवरोध, समस्याको स्थायी समाधान खोज्दै सरकार

काठमाडौँ । सङ्खुवासभामा निर्माणाधीन ९०० मेगावाट क्षमताको अरुण तेस्रोको स्थलगत अध्ययन गरेर उच्चस्तरीय कार्यदल फर्किएको छ । स्थानीयले आयोजनाको पावर हाउस प्रवेशमार्गमा ६७ दिन लामो अवरोध सृजना गरेपछि समस्या समाधानका लागि उच्चस्तरीय कार्यदल गठन भएको थियो । सो कार्यदल ९ दिनको स्थलगत भ्रमण सकेर काठमाडौँ फर्किएको हो ।

स्थानीय वासिन्दाले २४.५ किलोमिटर लामो प्रवेशमार्गको मुआब्जा माग्दै ६७ दिन लामो अवरोध खडा गरेका थिए । पटक–पटक मुआब्जा माग्दै आयोजनामा अवरोध पुर्‍याउन थालेपछि सरकारले तीन सदस्यीय उच्चस्तरीय कार्यदल गठन गरेको थियो । अर्जुनजंग थापा नेतृत्वको कार्यदलमा जनकराज दाहाल र पद्यनिधि सोती सदस्य छन् ।