रौतहटको नमूना विद्यालय भवन निर्माणमा भ्रष्टाचार, चारजना विरुद्ध मुद्दा दायर

रौतहटको राजपुर नगरपालिका–५ स्थित जनता (नमूना) माध्यमिक विद्यालयको आठ कोठे प्रि–स्कुल ब्लक भवन निर्माणका क्रममा ११ लाख रुपैयाँभन्दा बढीको आर्थिक अनियमितता भएको आरोपमा अख्तियार दुरुपयोग अनुसन्धान आयोगले चार जनाविरुद्ध मुद्दा चलाएको छ।

राजपुर नगरपालिकाले २०७५ फागुन ३ गते नमूना विद्यालय विकास कार्यक्रमअन्तर्गत विद्यालयको बहुवर्षीय गुरुयोजना स्वीकृत गरी प्रधानाध्यापकको अध्यक्षतामा भौतिक संरचना निर्माण समिति गठन गरेर काम अघि बढाएको थियो। सुरुमा भवन निर्माणको लागत अनुमान ९७ लाख ३७ हजार ९९४ रुपैयाँ तय गरिएकोमा पछि त्यसलाई संशोधन गरी १ करोड ५ लाख ७७ हजार ५९६ रुपैयाँ कायम गरियो। तर, निर्माण कार्य सम्पन्न भएको भन्दै वास्तविक अनुमानभन्दा बढी अर्थात् १ करोड ९ लाख ८१ हजार ५०१ रुपैयाँको नक्कली मूल्याङ्कन बिल र कार्य सम्पन्न प्रतिवेदन तयार पारी सरकारी रकम हिनामिना गरेको अनुसन्धानबाट खुलेको छ।