छात्रवृत्ति चिकित्सकले धानेको दुर्गमको स्वास्थ्य सेवा

४ भदौ, काठमाडौं । बझाङका दिलबहादुर गुरुदानीले बीपी कोइराला स्वास्थ्य विज्ञान प्रतिष्ठानबाट सन् २०२१ मा एमबीबीएसको अध्ययन पूरा गरे । सरकारी छात्रवृत्तिमा एमबीबीएस अध्ययन गरेका उनले दुर्गममा दुई वर्षका लागि सेवा गर्नुपर्ने पूर्वसर्त थियो । दिलबहादुरले बझाङ रोजे, सरकारले स्वीकृति दियो ।

‘दुर्गममा जन्मिएकाले सानो अवस्थामा स्वास्थ्य सेवा नपाएर मृत्यु भएका घटनालाई नजिकबाट देखेको थिएँ,’ २०६० सालमा छिमेकी काकी सुत्केरी हुन नसक्दा घरमै मृत्यु भएको पीडाले चिकित्सक बनेका डा. गुरुदानी भन्छन्, ‘बझाङ जस्तो दूरदराजमा गएर स्वास्थ्य सेवा दिन पाउँदा छुट्टै उमङ्ग हुन्छ ।’