मध्यपूर्वको तनाव साम्य हुने आशादेखि विश्वकप फुटबलको उत्सवसम्म

'लोकान्तर राउण्ड अप'मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ-

अमेरिकी राष्ट्रपति डोनाल्ड ट्रम्पले इरानसँगको युद्ध अन्त्यका लागि प्रारम्भिक सहमति भएको दाबी गरेका छन् । उनले इरानमाथि गर्ने भनिएको सैन्य आक्रमणको योजना रद्द गरेलगत्तै यस्तो घोषणा गरेका हुन् ।

बिहीबार ओभल अफिसमा सञ्चारकर्मीहरूसँग कुरा गर्दै राष्ट्रपति ट्रम्पले भने, 'हामीले भर्खरै इरानसँगको युद्ध समाधानका लागि एउटा ठूलो सहमति गरेका छौं ।' उनले यो सम्झौताको मुख्य उद्देश्य इरानलाई आणविक हतियार बनाउनबाट सधैंका लागि रोक्नु रहेको बताएका छन् । यो सहमति कार्यान्वयनमा गएमा मध्यपूर्वको तनाव साम्य हुने आशा गरिएको छ ।

००००

फिफा विश्वकप २०२६ को उद्घाटन खेलमा सह-आयोजक मेक्सिको विजयी भएको छ।

नेपाली समयअनुसार शुक्रबार बिहान मेक्सिको सिटीस्थित ऐतिहासिक एस्टेका स्टेडियममा भएको तनावपूर्ण खेलमा मेक्सिकोले दक्षिण अफ्रिकालाई २–० गोल अन्तरले पराजित गरेको हो।

८० हजार ८ सय २४ दर्शकको उत्साहजनक उपस्थिति र गायिका शकिराको विशेष सांगीतिक प्रस्तुतिसहित सुरु भएको उद्घाटन समारोहपछि मैदानमा मेक्सिकोले आफ्नो दबदबा कायम राख्यो। खेलमा तीन वटा रातो कार्डको प्रयोग भएको थियो ।

०००००

नेपाली कांग्रेसले सञ्चालन गरेको क्रियाशील सदस्यता अध्यावधिक अभियानअन्तर्गत ५ लाख ३८ हजार ६ सय २२ जनाले एनसीआईडी प्राप्त गरी सदस्यता अध्यावधिक गराएका छन्।

कांग्रेसका कार्यवाहक मुख्य सचिव कृष्णप्रसाद दुलालद्वारा जारी विज्ञप्तिअनुसार अध्यावधिकका लागि योग्य कुल ७ लाख ८२ हजार २०९ सदस्यमध्ये उक्त सङ्ख्याका सदस्यले वडा सभापतिमार्फत एनसीआईडी प्राप्त गरेका हुन्। त्यस्तै, १ लाख ४९ हजार ३ सय ९ जनाले स्वयं अध्यावधिक फाराम पेश गरी प्रक्रिया अगाडि बढाएको उनले बताए ।

००००

उर्जा, जलस्रोत तथा सिँचाइ मन्त्रालयद्वारा गठित उच्चस्तरीय समितिले काम नगर्ने ३८ जलविद्युत् आयोजनाको लाइसेन्स खारेज गर्न सिफारिस गरेको छ ।

सरकारको १०० बुँदे शासकीय सुधार कार्ययोजनाअनुसार ऊर्जा मन्त्रालयका सहसचिव मोहन शाक्यको संयोजकत्वमा गठित समितिले मन्त्री विराजभक्त श्रेष्ठलाई बुझाएको प्रतिवेदनमा यस्तो सिफारिस गरेको हो ।

००००

समस्याग्रस्त सहकारी व्यवस्थापन समितिको कार्यालयले समस्याग्रस्त घोषित हाम्रो नयाँ कृषि र कृषि विकास बहुउदेश्यीय सहकारी संस्था लिमिटेडका १३२ ऋणीको नामावली सार्वजनिक गरेको छ । तीमध्ये हाम्रो नयाँ कृषि सहकारीको १२ र कृषि विकास बहुउदेश्यीय सहकारीका १२० ऋणी छन् ।

००००

अध्ययन भिसा सिफारिस प्रक्रियामा शंकास्पद कागजात र नक्कली रसिद प्रयोग भएको आशंका देखिएपछि शिक्षा तथा खेलकुद मन्त्रालयले विस्तृत छानबिन गरी कानुनी कारबाही प्रक्रिया अगाडि बढाउन गृह मन्त्रालयलाई पत्राचार गरेको छ ।

शिक्षा मन्त्रालयले बिहीबार गृह मन्त्रालयलाई पठाएको पत्रमार्फत विदेशी विद्यार्थीका लागि जारी गरिएको अध्ययन भिसा सिफारिससँग सम्बन्धित कागजातहरूमा गम्भीर शंका उत्पन्न भएको भन्दै अनुसन्धान र आवश्यक कानुनी प्रक्रिया अघि बढाउन पत्राचार गरेको हो ।

००००

सरकारले काठमाडौं उपत्यकाका भूमिहीन तथा अव्यवस्थित बसोबासका नागरिकलाई दुर्घटना बीमा, स्वास्थ्य बीमा र जीवन बीमा सेवा प्रदान गर्न तयारी थालेको छ।

सरकारले तोकेको होल्डिङ सेन्टरमा आश्रय लिइरहेका परिवारलाई बीमा कार्यक्रममा आबद्ध गराउन आवश्यक कार्यविधि निर्माणको तयारी भइरहेको छ।

००००

प्रतिनिधिसभाको बिहीबारको बैठकले ‘नेपाल राष्ट्र बैङ्क (तेस्रो संशोधन) विधेयक, २०८३ माथि विचार गरियोस भन्ने प्रस्ताव सर्वसम्मतिले स्वीकृत गरेको छ ।

सभामुख डोलप्रसाद अर्यालले उक्त विधेयकमाथि निर्णयार्थ प्रस्तुत गर्दै सो प्रस्ताव सर्वसम्मत रूपमा स्वीकृत भएको घोषणा गरेका हुन् । बिहीबारकै बैठकमा बजेटमाथि छलफल चलेको थियो ।

००००

काठमाडौं जिल्ला प्रशासन कार्यालयले फिफा विश्वकप फुटबल २०२६ का खेलहरू सामूहिक रूपमा प्रत्यक्ष प्रसारण गर्नुअघि पूर्वस्वीकृति लिनुपर्ने जनाएको छ ।

कार्यालयले बिहीबार सूचना जारी गर्दै बिहीबार रातिदेखि गतेदेखि शुरू हुने विश्वकपका खेलहरू ठूलो पर्दामा देखाउने नाममा अनुमति नलिई भीडभाड नगर्न सम्बन्धित संघसंस्था तथा कम्पनीलाई आग्रह गरेको हो ।

००००

इन्फिनिटी होल्डिंग्स प्रालिका सञ्चालक अध्यक्ष दीपक भट्टसहित ४ जनाविरुद्ध ४२ करोड बढी बिगो दाबीसहित उच्च अदालत पाटनमा मुद्दा दायर भएको छ ।

विभिन्न बैंकहरूबाट व्यवसाय सञ्चालनका लागि लिइएको कर्जा व्यक्तिगत फाइदा र अन्य कम्पनीको शेयर खरिदमा दुरुपयोग गरेको आरोपमा सरकारले उनीहरू विरुद्ध बिहीबार उच्च अदालत पाटनमा मुद्दा दायर गरेको हो ।

००००

स्थानीय बजारमा बिहीबार पनि सुनचाँदीको मूल्यमा गिरावट आएको छ।

नेपाल सुनचाँदी व्यवसाय महासंघका अनुसार बिहीबार सुनको मूल्य प्रतितोला ५ हजार १०० रुपैयाँ र चाँदीको मूल्य ९० रुपैयाँले घटेको छ ।

महासंघले निर्धारण गरेको नयाँ मूल्यअनुसार छापावाल सुन प्रतितोला २ लाख ८६ हजार ७०० रुपैयाँमा कारोबार भइरहेको छ। त्यस्तै, चाँदीको मूल्य प्रतितोला ४ हजार ६५० रुपैयाँ कायम भएको छ ।