सांसद भण्डारीलाई थप उपचारका लागि मुम्बई लगियो

काठमाडौं । आफ्नै घरमा प्रयोग गरिरहेको ग्याँस सिलिन्डर पड्किएर सख्त घाइते भएका नेपाली कांग्रेसका नेता एवं सांसद डा. चन्द्र भण्डारीलाई थप उपचारका लागि भारत लगिएको छ । सोही घटनामा सख्त घाइते भएकी सांसद भण्डारीकी ८६ वर्षीया आमा हरिकला भण्डारीको भने उपचारकै क्रममा बिहीबार निधन भएको छ । कीर्तिपुरस्थित कीर्तिपुर बर्न अस्पतालकी मेडिकल डाइरेक्टर डा. निजिना ताम्राकारले उहाँको बिहान करिब १० बजेर ५७ मिनेटमा उपचारका क्रममा निधन भएको बताउनुभयो ।

हात, गोडा र अनुहार गरी शरीरको २५ प्रतिशत भाग जलेर घाइते भएका सांसद भण्डारीलाई कीर्तिपुर बर्न अस्पतालको सल्लाहबमोजिम थप उपचारका लागि भारतको मुम्बई लगिएको हो । कांग्रेस केन्द्रीय सदस्य अजयबाबु सिवाकोटीका अनुसार उहाँलाई श्री एयरलाइन्सको जहाज चार्टर गरेर भारतको मुम्बईस्थित नेसनल बर्न सेन्टरमा लगिएको हो । भण्डारीको उपचार नेपालमा सम्भव नहुने भएपछि भारत रिफर गर्नुपरेको डा. ताम्राकारको भनाइ छ ।