‘भोट हाल्नै सिकाएनन्’

इलाम : सोममाया राईले १७ वर्षको उमेरदेखि नै इलामको कन्याम चिया बगानमा चिया टिप्न थालेकी हुन्। अहिले ६० वर्ष लागिन। तर, पिठ्यूँमा चियाको डोकोले अझै छाडेको छैन।

मेची राजमार्गको आडमा बिहानैदेखि चिया टिप्छिन्। न कसैले उनीसँग भोट मागेको छ, न त उनलाई भोट हाल्न नै सिकाएको छ। ‘कसरी भोट हाल्ने ? कसैले सिकाएको छैन,’ अन्नपूर्णसँग उनले दुःखेसो पोखिन्। राईमात्र होइन, चिया बगानका १ सय ५० श्रमिकसँग कसैले मत पनि मागेका छैनन्। पार्टीका झण्डा बोकेका गाडीहरू चिया बगान भएरै यताउता कुदिरहेका हुन्छन्। ‘अहिलेसम्म भोट माग्न कोही आएको छैन,’ राईले भनिन्।