पाठेघर क्यान्सरसम्बन्धी शिविरमा २०५ जनाले सेवा लिए

गुल्मीको इस्मा गाउँपालिकाले दुई छुट्टाछुट्टै वडामा महिलाका लागि निःशुल्क पाठेघरको मुखको क्यान्सरसम्बन्धी स्क्रिनिङ शिविर सञ्चालन गरेको छ। यस गाउँपालिकाको वडा नम्बर १ हस्तिचौरस्थित हस्तिचौर स्वास्थ्य चौकी र वडा नम्बर ४ दोहलीस्थित दोहली स्वास्थ्य चौकीमा यो शिविर सञ्चालन गरिएको इस्मा गाउँपालिकाका स्वास्थ्य शाखा प्रमुख पदम अधिकारीले जानकारी दिनुभयो।

उहाँका अनुसार दुई वटै स्वास्थ्य चौकीमा भएको निःशुल्क पाठेघरको मुखको क्यान्सरसम्बन्धी स्क्रिनिङ शिविरमा २०५ जना महिलाहरुले सेवा लिनुभएको हो। स्थानीय महिलाहरूको स्वास्थ्यलाई मध्यनजर गरी गुल्मी अस्पताल तम्घासको प्राविधिक सहयोगमा यस गाउँपालिकाले शिविरको आयोजना गरेको हो। हस्तिचौर स्वास्थ्य चौकीमा भएको शिविरमा ८५ जना र दोहली स्वास्थ्य चौकीमा भएको शिविरमा १२० जनाले सेवा लिनुभएको छ।