सार्वजनिक लेखा र अन्तर्राष्ट्रिय सम्बन्ध समितिको बैठक बस्दै

काठमाडौँ । प्रतिनिधि सभा अन्तर्गतका दुई वटा महत्वपूर्ण संसदीय समितिको बैठक बस्ने भएको छ। आज सार्वजनिक लेखा समितिको सातौँ बैठक र अन्तर्राष्ट्रिय सम्बन्ध तथा पर्यटन समितिको पाँचौँ बैठक बस्न लागेको हो। बैठकहरूमा देशको वित्तीय अनुशासन र हवाई सुरक्षा जस्ता संवेदनशील विषयहरूमा केन्द्रित रहेर छलफल हुने कार्यसूची तय गरिएको छ।

बिहान ८:३० बजे सार्वजनिक लेखा समितिको सातौँ बैठक बस्नेछ। उक्त बैठकमा विभिन्न सरकारी निकायका लेखा उत्तरदायी अधिकृत (मन्त्रालयका सचिव तथा कार्यालय प्रमुख) हरूलाई आमन्त्रण गरिएको छ। बैठकमा सरकारी निकायहरूमा आर्थिक अनुशासन कायम गर्ने र बर्सेनि बढ्दै गइरहेको बेरुजुलाई कसरी न्यूनीकरण गर्ने भन्ने विषयमा सरोकारवाला अधिकारीहरूसँग विस्तृत छलफल गरिने कार्यसूची रहेको छ।