सेवा आयोग अध्यक्षलाई दुर्व्यवहार

मोरङ — पूर्वाञ्चल विश्वविद्यालयमा २२ वर्षपछि विज्ञापन खुलाएर कर्मचारी भर्ना प्रक्रिया अघि बढाएका सेवा आयोग अध्यक्ष महेशराज दाहाललाई नेविसंघ, मोरङले दुर्व्यवहार गरेको छ । सुनसरीको इटहरी उपमहानगरको आँपगाछीस्थित आवासमा प्रवेश गरेर सोमबार नेविसंघका नेताहरूले दाहालको अनुहारमा मोसोजस्तो कालो पदार्थ पोखिदिएका हुन् ।

सेवा आयोगको अध्यक्ष भएपछि दाहालले अधिकृतदेखि श्रेणीविहीनसम्मका १ सय १५ कर्मचारी भर्ना गर्न २०७८ चैत १५ मा विज्ञापन खुलाएका थिए । ‘पहिलो पत्रको परीक्षा २०७९ भदौ २६ देखि २८ सम्ममा लियौं,’ दाहालले भने, ‘२०७९ असोज २४ मा परिणाम सार्वजनिक गरेदेखि विद्यार्थी आन्दोलनका कारण कुनै प्रक्रिया अघि बढ्न सकेको छैन ।’