नीर शाहको निर्देशनमा ‘कमला मिस’ साउन २२ गतेबाट प्रदर्शनमा आउँदै

काठमाडौँ- अभिनेता नीर शाहले करिब १० वर्षपछि निर्देशनमा पुनरागमन गरेको फिल्म ‘कमला मिस’ साउन २२ गतेबाट प्रदर्शनमा आउँदैछ । यतिबेला पोस्ट प्रोडक्सनमा रहेको यस फिल्मको सोमबार फर्स्टलुक पोस्टर सार्वजनिक गरिएको छ। फिल्मकी मुख्य अभिनेत्री बासना तिमल्सिनालाई केन्द्रमा राखिएको पोस्टरले कथावस्तुबारे संकेत गरेको छ ।

‘ब्ल्याक’ थिममा तयार पारिएको पोस्टरमा बासना गम्भीर मुद्रामा कतै हेरिरहेको अवस्थामा देखिएकी छन् । विद्याकी देवी सरस्वतीको मूर्तिलाई पनि पोस्टरमा प्राथमिकताका साथ राखिएको छ । यसले फिल्मको कथा शिक्षासँग सम्बन्धित रहेको दर्शाउँछ । पोस्टरमा बासनालाई दिइएको महत्त्व हेर्दा फिल्मको मूल कथा उनकै पात्रको वरिपरि घुमेको अनुमान गर्न सकिन्छ ।