वसन्त ऋतुको हिमाल आरोहण: ११ सय ८१ आरोहीले लिए अनुमति

काठमाडौँ । यसवर्षको वसन्त ऋतुमा विश्वको सर्वोच्च शिखर सगरमाथालगायत नेपालका विभिन्न हिमाल आरोहणका लागि अनुमति लिने विदेशी पर्यटकको सङ्ख्यामा उल्लेख्य वृद्धि भएको छ। पर्यटन विभागले सार्वजनिक गरेको पछिल्लो विवरण अनुसार सन् २०२६ को यस सिजनमा हिमाल चढ्न विश्वका ७९ देशका एक हजार १८१ जना आरोहीले औपचारिक अनुमति लिएका छन्। विभागका सूचना अधिकारी हिमाल गौतमका अनुसार यस वर्ष पनि सबैभन्दा धेरै आकर्षण सगरमाथा आरोहणमा देखिएको छ, जहाँ हालसम्म ५५ देशका ४९४ जना आरोहीले अनुमति बुझिसकेका छन्।

सगरमाथा आरोहणका लागि अनुमति लिनेमा सबैभन्दा बढी १०९ जना चिनियाँ नागरिक रहेका छन्। यसबाहेक अमेरिकाका ७७, भारतका ६१, बेलायतका ३२, रुसका १८, अस्ट्रेलियाका १५, जापानका १४, नेपालका १२ र ब्राजिलका १० जनाले अनुमति लिएको सूचना अधिकारी गौतमले जानकारी दिए। सगरमाथा बाहेक अन्य हिमालतर्फ ल्होत्सेका लागि १४३, आमादब्लमका लागि १११, नुप्त्सेका लागि ५६, हिम्लुङका लागि ४६, कञ्चनजङ्घाका लागि ३६ र धवलागिरि हिमालका लागि ३० जनाले आरोहण अनुमति लिएका छन्।