रास्वपाको सत्ता रणनीति: चुपचाप बालेनलाई साथ

काठमाडौं । प्रतिनिधिसभा निर्वाचनमा राष्ट्रिय स्वतन्त्र पार्टी (रास्वपा)ले एउटा रणनीति बनायो– चुपचाप घण्टीमा छाप । रास्वपाको यो रणनीतिसँगै ‘घण्टी चिन्ह र बालेन’ ब्रान्डिङले दुईतिहाइ नजिकको जीत निकाल्न सफल भयो । नयाँ संविधान जारी भएपछि पहिलोपटक संविधानको धारा ७६ को उपधारा १ अनुसार सरकार बनाउने गृहकार्यमा रहेको रास्वपाले सरकार सञ्चालनका लागि पनि चुनावकै जस्तो नारा र रणनीति तय गरेको छ ।

रास्वपाले वरिष्ठ नेता बालेन्द्र शाह (बालेन) को नेतृत्वमा सरकार गठन भएपछि ‘चुपचाप बालेनलाई साथ’को नारासहित सरकार सञ्चालन प्रक्रिया अघि बढाउने भएको छ । रास्वपाको यही रणनीतिअनुसार प्रधानमन्त्रीको शपथग्रहणअघिबाटै पार्टीले भावी प्रधानमन्त्रीलाई ‘रियल र भर्चुअल’ दुवै स्थानबाट चुपचाप राख्दै आएको छ । रास्वपा उच्च स्रोतका अनुसार यो नीतिले सरकारका काममा सांसद, मन्त्री र पार्टी सदस्यले सहयोग गर्ने, सरकारले गरेका नराम्रा काम सरकार र पार्टी संयन्त्रभित्र राखेर समाधानको पहल गर्ने जस्ता विषय छन् ।