‘लुम्बिनीको समृद्धि गौतम बुद्ध विमानस्थलबाटै’

भैरहवा — लुम्बिनी प्रदेशको पर्यटन प्रवर्द्धन र समग्र आर्थिक विकासका लागि भैरहवास्थित गौतम बुद्ध अन्तर्राष्ट्रिय विमानस्थललाई पूर्ण क्षमतामा सञ्चालन गर्नुपर्नेमा सरोकारवालाले जोड दिएका छन् । निर्माण सुरु गर्नुपूर्व नै सरकारी निकायबीच समन्वय नभएकाले उडान हुन नसकेको पनि उनीहरूले टिप्पणी गरेका छन् ।

देशको दोस्रो अन्तर्राष्ट्रिय हवाई अड्डाका रूपमा सञ्चालनमा आएको यो विमानस्थलबाट पुसयता अन्तर्राष्ट्रिय उडान हुन सकेको छैन । भैरहवामा पहिलो व्यावसायिक उडान गरेको जजिरा एयरलाइन्स र मलेसियाका लागि चार्टर्ड उडान सुरु गरेको नेपाली वायु सेवा कम्पनी हिमालय एयरलाइन्सले जाडोयाममा भिजिबिलिटी कम भएको र यात्रुको चाप पनि नरहेको भन्दै अन्तर्राष्ट्रिय उडान रोकेका छन् ।