निरन्तर खबरदारीको आवश्यकता

हामी मिडियाकर्मीले खबरदारी गर्न कहिल्यै पनि छोड्नुहुँदैन । गलत काम गर्न खोज्नेहरुलाई हाम्रो खबरदारीले केही हदसम्म भने पनि सतर्क पार्छ । फेरि देश आज किन बन्न सकेन भनेर बहस पैरवी हुने गर्छ । त्यसका कारणहरुका बारेमा पनि धेरैलाई थाहा छ, तर पनि देश अझै विकास र समृद्धितर्फ किन अगाडि बढ्न सकिरहेको छैन त ? यो गम्भीर प्रश्न अनि चिन्ता र चासो हो ।

यसो हेर्दा, शासक–प्रशासकहरुले जनतालाई केन्द्रविन्दुमा राखेर इमानदारितापूर्वक काम गर्न नसकेकाले नै मुलुक बन्न नसकेको जस्तो देखिन्छ । आधारभूत आवश्यकताका रुपमा रहेका जनताका गाँस, बास, कपास, स्वास्थ्य, शिक्षा, रोजगारी र प्रविधिलाई सर्वसुलभ बनाउन सरकार र राज्य पक्ष वर्षौंदेखि नराम्ररी चुक्दै आइरहेका छन् । हातमा शासन सत्ताको डाडु–पन्यू भएर पनि जनतालाई आशा जगाउन सक्दैनन् भने प्रश्न गर्ने तिनीहरुलाई नै हो । जो सिंहदरबार र बालुवाटारमा राज गर्छन्, हालिमुहाली गर्छन् तर जनताका तमाम समस्यालाई समाधान गर्न पहल गर्दैनन्, दोषी उनीहरु नै हुन् । त्यसैले हामी मिडियाकर्मीहरुले जनताको मर्का नबुझ्ने तर आफ्नो मात्रै दुनो सोझ्याउन तल्लीनहरुलाई बारम्बार प्रश्न गर्दै उनीहरुलाई सुधारतर्फ अघि बढ्न दबाब दिन चुक्नुहुँदैन । तर आज मिडिया क्षेत्र पनि स्वार्थमा नै चुर्लुम्म डुब्न पुग्दा शासक–प्रशासकहरु झनै छाडा र अराजक भइरहेका छन् । मिडियाको महत्व दिनानुदिन घट्दो छ । यो पनि हामी मिडियाकर्मीको लागि गम्भीर समीक्षाको विषय बन्नुपर्छ । तर पनि हामी बाहिरबाट वाचडगको भूमिकामा रहनेहरु हौं ।