युद्ध रोक्न पुटिनलाई जेलेन्स्कीको खुला पत्र, मस्कोद्वारा स्वागत

एजेन्सी । युक्रेनी राष्ट्रपति भोलोदिमिर जेलेन्स्कीले रुसी राष्ट्रपति भ्लादिमिर पुटिनलाई एक खुला पत्र पठाउँदै युद्ध अन्त्यका लागि प्रत्यक्ष वार्ताको प्रस्ताव गरेका छन् । अमेरिकाको ध्यान युरोपको युद्धबाट मोडिएको स्वीकार गर्दै जेलेन्स्कीले हात बाँधेर बस्नुको साटो दुई देशबीचको सिधा संवादबाटै शान्ति खोज्नुपर्ने बताएका हुन् । क्रेमलिनले पत्र प्राप्त भएको पुष्टि गर्दै जेलेन्स्कीलाई मस्कोमा स्वागत गर्ने जवाफ फर्काएको छ ।

राष्ट्रपति जेलेन्स्कीले युद्धको निकासका लागि पुटिनसमक्ष आमनेसामने बैठकको आह्वान गर्दै प्रस्तावित वार्ता नसकिएसम्म पूर्ण युद्धविराम हुनुपर्ने माग राखेका छन् । यता क्रेमलिनले उक्त पत्र राष्ट्रपति पुटिनसमक्ष पेस गरिने जानकारी दिँदै जेलेन्स्कीलाई मस्को आएर भेट्न खुला निमन्त्रणा दिएको छ । अमेरिकी राष्ट्रपति डोनाल्ड ट्रम्पले समेत दुई नेताबीचको सम्भावित भेटवार्तालाई ‘उत्कृष्ट’ भन्दै सकारात्मक प्रतिक्रिया दिएका छन् ।