वर्षा, बाढी र पहिरोको कहर: देशका यी मुख्य राजमार्गहरू पूर्ण तथा आंशिक अवरुद्ध

काठमाडौं । देशभर भइरहेको लगातारको वर्षा, बाढी, पहिरो तथा विभिन्न स्थानमा जारी सडक मर्मतका कारण मुलुकका प्रमुख राजमार्गहरूमा यातायात सेवा नराम्ररी प्रभावित भएको छ। कतिपय महत्त्वपूर्ण सडक खण्डहरू पूर्ण रूपमा ठप्प भएका छन् भने कतिपयमा एकतर्फी मात्र सवारी साधन सञ्चालन भइरहेका छन्।

प्रभावित भएका मुख्य सडक खण्डहरू -

सतुङ्गल-चित्लाङ खण्ड: काठमाडौँ उपत्यका भित्रिने वैकल्पिक मार्गको रूपमा रहेको सतुङ्गल-चित्लाङ सडक जेठ १६ गतेदेखि नै पूर्ण रूपमा ठप्प छ। चन्द्रागिरी नगरपालिका–९, देउराली देवीस्थानमा खसेको पहिरो र सडक मर्मत कार्यका कारण यो सडक खण्ड अझै एक महिनासम्म बन्द रहने जनाइएको छ।

कुलेखानी-फर्पिङ खण्ड: मकवानपुरको ईन्द्रसरोवर गाउँपालिका क्षेत्रमा सडक स्तरोन्नति तथा मर्मतको काम भइरहेकाले कुलेखानी-फाखेल-हुमाने-फर्पिङ-काठमाडौँ सडक खण्ड एक महिनाका लागि पूर्ण रूपमा बन्द गरिएको छ। यो सडक जेठ १५ गतेदेखि नै बन्द रहेको हो।

पूर्वी नेपालका राजमार्गहरूमा सास्ती

मेची करिडोर: इलामको पुवाखोलामा आएको लेदोसहितको बाढीका कारण मेची करिडोर पूर्ण रूपमा अवरुद्ध भएको छ। यद्यपि, यसको वैकल्पिक मार्गका रूपमा मेची राजमार्ग प्रयोग गर्न सकिने सम्बद्ध निकायले जनाएको छ।

खोटाङ र अन्य क्षेत्र: खोटाङको पङ्खु खोलामा जेठ २ गते खसेको पहिरो अझै हटाउन नसक्दा त्यहाँ यातायात सेवा पूर्ण रूपमा अवरुद्ध छ। यस्तै, भोजपुरको बोखिम र पाँचथरको दोभानमा बाढीका कारण सडक क्षतिग्रस्त हुँदा यातायात एकतर्फी मात्र सञ्चालन भइरहेको छ।

बीपी राजमार्गमा सवारी रोक्का

बाढीको सम्भावित उच्च जोखिमलाई मध्यनजर गर्दै बीपी राजमार्गको काभ्रेपलाञ्चोक खण्डमा गुड्ने सवारी साधनहरूमा रोक लगाइएको छ। जेठ २२ गतेदेखि नै यस खण्डमा सुरक्षाका कारण गाडी चलाउन बन्द गरिएको हो।

वर्षाको समयमा यात्रा गर्दा सडकको ताजा अवस्था बुझेर र आवश्यक सतर्कता अपनाएर मात्र निस्कन ट्राफिक प्रहरीले अनुरोध गरेको छ।