मधेस क्षेत्र अहिले विष्फोटको स्थितिमा छ, समयमै उपचार खोज्न सरकारलाई सिंहको चेतावनी

काठमाडौँ । सत्तारूढ दल राष्ट्रिय स्वतन्त्र पार्टी (रास्वपा) का सांसद डा. अमरेशकुमार सिंहले सरकारले संसद्‌मा पेस गरेको विनियोजन विधेयकको सिद्धान्त र प्राथमिकताको विरोध गरेका छन् । मधेस क्षेत्रको विकास र समेटिनुपर्ने योजनाका लागि सो विधेयकमा कुनै पनि शब्द समेत उल्लेख नगरिएको जिकिर गर्दै उनले असन्तुष्टि व्यक्त गरेका हुन् ।

मंगलबार प्रतिनिधि सभा बैठकमा सो विधेयकमाथिको छलफलमा भाग लिँदै सांसद सिंहले राणा कालदेखि बन्न सुरु गरेको हुलाकी राजमार्ग सम्पन्न गर्ने विषयमा सरकारले कुनै शब्द समेत उच्चारण नगरेको भन्दै आक्रोश व्यक्त गरे । चुनावका बेला मधेसले सबैभन्दा बढी मत दिएर सत्तामा पुर्‍याए पनि सरकारले सोही क्षेत्रको चरम उपेक्षा गरेको भन्दै उनले आपत्ति जनाए ।