नेपाल वायुसेवा निगमको सञ्चालक सदस्य छनोट प्रक्रियाविरुद्धको रिट न्यायाधीश ढुङ्गाना र थापाको इजलासमा

काठमाडौँ । नेपाल वायुसेवा निगम (नेपाल एयरलाइन्स) को सञ्चालक समिति सदस्य छनोट गर्ने प्रक्रियाविरुद्धको रिट सर्वोच्च अदालतमा सुनुवाइका लागि पेसी तोकिएको छ । सर्वोच्च अदालतका न्यायाधीशद्वय टेकप्रसाद ढुङ्गाना र शान्तिसिंह थापाको इजलासमा सुनुवाइका लागि पेसी तय भएको हो ।

काठमाडौँ महानगरपालिका वडा नं. ३१ का उपेन्द्र बहादुर कार्कीले संस्कृति, पर्यटन तथा नागरिक उड्डयन मन्त्रालयलाई विपक्षी बनाउँदै रिट दायर गरेका थिए । रिट निवेदक कार्कीले आफू उक्त छनोट प्रक्रियाको प्रस्तुतीकरण र अन्तर्वार्तामा सहभागी भई उत्कृष्ट प्रस्तुति दिएको तर मन्त्रालयले योग्यताक्रम र तोकिएको मापदण्ड मिचेर गैरकानूनी रूपमा अन्य व्यक्तिहरूलाई छनोट गरेको दाबी गरेका थिए ।