सच्चिनु त नागरिकले पनि पर्ला नि !

वैशाख १० गते सम्पन्न भएको उपनिर्वाचनमा राष्ट्रिय स्वतन्त्र पार्टी अत्यधिक मतका साथ विजयी हुन सफल भएपछि राजनीतिक वृत्तमा ठूलो तरंग आएको छ । उक्त तरंगले ठूला भनिने राजनीतिक दलहरुमा ‘अब सक्किने हो कि सच्चिने हो ?’ भन्ने बुँदामा पनि व्यापक बहस चल्न थालेको छ । हुन पनि तीन ठाउँमा भएको उपनिर्वाचनमध्ये पहिलो बारा जिल्लामा उपेन्द्र यादवले जुन विजय हासिल गर्नुभएको छ त्यसले त्यति महत्व राखेको देखिँदैन । उहाँ जित्नकै लागि त्यहाँबाट उम्मेदवार बन्नुभएको थियो, जित्नुभयो । उहाँ गठबन्धनमा पनि हुनुहुन्थ्यो । तर चितवनमा रवि लामिछानेले पहिलेको निर्वाचनमा भन्दा बढी भोट र पहिलेको निर्वाचनमा लिएको भन्दा बढी अन्तरले जित्नु नागरिक वृत्तमा उत्साहको विषय बनेको छ । ठूला भनिने राजनीतिक दलहरुको एकसूत्रीय प्रहार, सरकारमा सम्मिलित राजनीतिक दलहरुको गठबन्धनको उम्मेदवार अनि आफूलाई ठूला भन्न रुचाउने पत्रिकाहरुको छुट्टै चाल र आफूलाई सामाजिक अभियन्ता भन्न रुचाउने विभिन्न प्रकृतिका व्यक्तिहरुको अफवाहका बीच चितवनका नागरिकहरुले कसैको कुनै चाल, जाल र मालको परबाह नगरी रवि लामिछानेलाई अत्यधिक मत दिएर ऐतिहासिक विजय गराएका छन् । यसबाट चितवनका मतदाताहरु वास्तवमा सच्चिएको प्रमाणित भएको छ ।

तनहुँ आफैंमा नेपाली कांग्रेसको गढक्षेत्र हो । त्यसमा पनि गत निर्वाचनमा तनहुँका मतदाताले जिताएका आफ्ना प्रतिनिधिलाई राष्ट्रपतिजस्तो गरिमामय पदमा आसीन गराउन सफल भएको नेपाली कांग्रेसको अभियानले तनहुँका मतदाताले आँखा चिम्लेर गठबन्धनको उम्मेदवारलाई निर्वाचित गराउनेछन् भन्ने कुरामा सबै विश्वस्त थिए । स्थानीय व्यक्ति नै उम्मेदवार भएर निर्वाचित भएपछि मन्त्रीसमेत बन्न सक्ने प्रचारका बीच राष्ट्रिय स्वतन्त्र पार्टीबाट उम्मेदवार बन्न बाहिरबाट आएका डा. स्वर्णिम वाग्लेलाई तनहुँका मतदाताले भारी मतका साथ विजयी बनाए । त्यहाँ पनि कुनै शक्तिको चाल, जाल र मालले काम गरेन ।