ददि सापकोटाले ल्याए ‘ज्ञानिका’

काठमाडौँ — पत्रकार तथा लेखक ददि सापकोटाको छैटौं कृति ‘ज्ञानिका’ बजारमा आएको छ । काठमाडौंको प्रज्ञा–प्रतिष्ठानको डबलीमा शनिबार आयोजित कार्यक्रममा पुस्तक सार्वजनिक गरियो । कार्यक्रममा लेखक सापकोटा र वन्यजन्तुविद् रमा मिश्रसँग पत्रकार विराट अनुपमले अन्तर्क्रियासमेत गरे ।

लेखक ददि सापकोटाले यस पुस्तकमा संरक्षणका क्षेत्रमा आफ्नो जीवन समर्पित गरेका २१ जना ‘ज्ञानिका’ का अनुभव र उनीहरुका आवाजलाई समेटेका छन् । प्रकृतिसँग जोडिएको मानवीय सङ्घर्ष, वैज्ञानिक खोज र संरक्षणका प्रेरणादायी अनुभव यस पुस्तकमा छन् । पाठकले यहाँ विज्ञानका तथ्य मात्र होइन, ती तथ्यलाई जीवन्तता दिने मानवीय अनुभव र भावना पनि पाउने वन्यजन्तुविद् रमा मिश्रले बताइन् । यस पुस्तकले हामीभित्र पर्यावरणप्रतिको चेतना बढाउने र प्रकृतिप्रति माया अनि सम्मान जगाउने उनको भनाइ छ ।