नेविसंघको विवाद मिलाउन अध्यक्ष शेर्पाको दौडधुप, शेखर-गगन समूह नमिल्दा सहमति नभएको आरोप

काठमाडौं । नेपाली कांग्रेसको भ्रातृ संगठन नेपाली विद्यार्थी संघ (नेविसंघ) विवाद मिलाउने प्रयास असफल भएको छ । अध्यक्ष दुजाङ शेर्पाले १५ फागुनमा ‘ऐतिहासिक प्रथम बैठक तथा सम्मान कार्यक्रम’ बोलाएपछि नेविसंघको विवाद सतहमा आएको हो ।

तदर्थ समिति विस्तार भएको ६ महिनापछि बस्न लागेको पहिलो बैठकमा नेविसंघको शेखर कोइराला—गगन थापा समूह आफेना मागको सुनुवाइ नभएसम्म सहभागिता नजनाउने अडानमा छ । सोमबार दिनभर अध्यक्ष शेर्पाले शेखर–गगन समूहसँग छलफल गरेपनि सहमति हुन नसकेको नेविसंघ केन्द्रीय सदस्य अनुप सुनुवारले बताए । अध्यक्ष शर्पा निकट सुनुवारले भने, 'अध्यक्षले आज दिनभर शेखर दाइ र गगन दाइको समूहसँग छलफल गर्नुभयो । उहाँलाई मिलेर आउन अध्यक्षले भन्नुभयो । तर उहाँहरू मिलेर नआउँदा सहमति हुन सकेको छैन ।'