बँदेल र खानेपानी संकटले गाउँ रित्तिँदै

खोटाङको रावा बेँसी गाउँपालिका–४ डुम्रेधारापानीस्थित डाँडागाउँ र कोटगाउँका ७५ प्रतिशतभन्दा बढी परिवार बसाइँ सरेका छन्। खानेपानीको चरम समस्या र जङ्गली जनावरको बढ्दो आतंकका कारण गाउँ रित्तिँदै गएको स्थानीयवासी बताउँछन्।

साविक डुम्रेधारापानी गाविस–७ अन्तर्गत पर्ने डाँडागाउँ र कोटगाउँमा एक समय करिब १०० घरधुरीको बसोबास थियो। हाल भने २३ घरधुरी मात्र बाँकी रहेका छन्। गाउँमा रहेका परिवारसमेत खानेपानी अभाव र बँदेल तथा बाँदरको समस्याले आजित बनेका छन्।