बन्चरेडाँडा ल्यान्डफिल साइट : ३ हजार रोपनी जग्गा अधिग्रहण गरेर मानव बस्तीरहित बनाउन माग

काठमाडौं । असोज १ गतेबाट बन्चरेडाँडा ल्यान्डफिल साईटमा फोहोर बिसर्जन ठप्प पार्ने घोषणा गरेका स्थानीयवासीले मानव बस्तीरहित स्थानमा मात्र फोहोर व्यवस्थापन गर्नुपर्ने आफ्नो अन्तिम माग भएको बताएका छन् । स्थानीय संघर्ष समितिका संयोजक श्रीराम ढुंगानाले फोहोरमैला व्यवस्थापन गर्दा प्रभावित हुने विशेष संवेदनशील क्षेत्रबाट मानव बस्तीहरू अलग गर्नुपर्ने आफूहरूको मुख्य माग भएको बताउनुभयो ।

प्रधानमन्त्री तथा मन्त्रिपरिषद्को कार्यालयसँग दुई वर्षअघिदेखि भएका निर्णय कार्यान्वयन नभएपछि आक्रोशित स्थानीयले करिब ३ हजार रोपनी जग्गा अधिग्रहण गरेर सो क्षेत्रलाई मानवरहित बनाउन माग गरेका छन् । प्रधानमन्त्री तथा मन्त्रिपरिषद्को कार्यालयले वि.सं. २०७८ कार्तिक १५ गते गरेको २१ बँुदे सम्झौता, माघ १४ गतेको मन्त्रिपरिषद्को निर्णय र २०७९ जेठ २७ गतेको उच्चस्तरीय बैठक र २०८० जेठ १ गते भएको निर्णय कार्यान्वन गर्न माग गर्दै स्थानीयले दोस्रोपटक आन्दोलन घोषणा गरेका छन् । संघर्ष समितिले माग पूरा गर्न सरकारलाई २० दिनको समय दिएको छ ।