रोकिएका चिनियाँ आयोजना अगाडि बढाउने तयारी : नेपाल–चीन संयन्त्रको बैठक बस्ने

काठमाडा । नेपालसँग भएको सम्झौताअनुसार चिनियाँ पक्षले बीआरआईलाई अगाडि बढाउन पहल थालेको छ। यसका लागि उच्चस्तरीय भ्रमण तथा बैठकहरूको तयारी भइरहेको छ।

सन् २०१७ को बीआरआई समझदारीपत्र र २०२४ को बीआरआई फ्रेमवर्कका आधारमा विभिन्न परियोजनाहरू अगाडि बढाउन आन्तरिक छलफल भइरहेको परराष्ट्र मन्त्रालयले जनाएको हो। यस प्रयोजनका लागि मन्त्रालयले सरोकारवाला मन्त्रालयहरूसँग आयोजनाहरूको प्रगति विवरण मागेको छ।

सन् २०२४ मा तत्कालीन प्रधानमन्त्री केपी शर्मा ओलीले आफ्नो चीन भ्रमणका क्रममा बीआरआई फ्रेमवर्कमा हस्ताक्षर गरेका थिए। सो क्रममा दुई देशबीच १० वटा आयोजनाहरू अघि बढाउने सहमति भएको थियो। तर, विभिन्न कारणले धेरैजसो आयोजनाहरू अलपत्र अवस्थामा छन्। ती आयोजनाहरू हाल कुन अवस्थामा छन् भन्नेबारे परराष्ट्र मन्त्रालयले खोजीनीति गर्न लागेको मन्त्रालयका एक अधिकारीले बताए।

परराष्ट्र मन्त्रालयका अनुसार आगामी जुन २ मा ‘नेपाल–चीन सहयोग कार्यक्रम तथा आयोजना कार्यान्वयन सहजीकरण संयन्त्र’को बैठक बस्न गइरहेको छ। सो बैठकअघि नै ती आयोजनाहरूबारे मन्त्रालयले अध्ययन गरिसक्ने बताइएको छ।

स्रोतका अनुसार उक्त बैठकको नेतृत्व नेपालका तर्फबाट परराष्ट्र सचिव अमृतबहादुर राई र चीनका तर्फबाट नेपालका लागि चिनियाँ राजदूत झाङ माओमिङले गर्नेछन्। यस बैठकपछि लामो समयदेखि रोकिएका आयोजनाहरूले गति लिने विश्वास मन्त्रालयले लिएको छ।

मन्त्रालय स्रोतका अनुसार बैठकमा नेपालमा चिनियाँ अनुदान र सहुलियतपूर्ण ऋणमा सञ्चालित आयोजनाहरूको प्रगति समीक्षा गरिनेछ। साथै, ढिलासुस्ती भएका कामहरूको समीक्षा गर्दै तिनलाई चाँडो अगाडि बढाउने विषयमा छलफल हुनेछ। विशेषगरी स्याफ्रुबेँसी–रसुवागढी राजमार्ग मर्मत तथा सुधार आयोजना, चिलिमे–रसुवागढी–केरुङ २२० केभी प्रसारण लाइन आयोजना, नेपाल–चीन अन्तरदेशीय रेलमार्ग आयोजना, काठमाडौँ चक्रपथ सुधार आयोजना, टोखा–छहरे सुरुङमार्ग र हिल्सा–सिमकोट सडक आयोजनाजस्ता परियोजना अगाडि बढाउने विषयमा छलफल हुने बताइएको छ।

यी आयोजनाहरूलाई गति दिन दुई देशबिच उच्चस्तरीय छलफल भई पत्रसमेत आदानप्रदान भएको छ। यस संयन्त्रको बैठकपछि चीनमा पनि अर्को संयुक्त परामर्श संयन्त्रको १७औँ बैठक बस्ने स्रोतले दाबी गरेको छ। उक्त बैठकको मिति पनि तय भइसकेको छ। सो बैठकमा भाग लिन परराष्ट्र सचिव राई आफैँ जाने बताइएको छ।

यी दुवै संयुक्त बैठक बस्नुअघि चीनको तिब्बत स्वायत्त क्षेत्रका उपाध्यक्ष झो पेङ नेपाल भ्रमणमा आउन लागेका छन्। नेपाल भ्रमणका क्रममा उनले उच्चस्तरीय भेटवार्ता गर्ने बताइएको छ। यद्यपि, यस भ्रमणबारे परराष्ट्र मन्त्रालयले भने अनभिज्ञता प्रकट गरेको छ।