५२ वर्षपछि विश्वकप खेल्दै डीआर कङ्गो : वान–बिसाका र योआने विस्सा समेटिँदै टोली घोषणा

काठमाडौँ । वेस्ट ह्यामका डिफेन्डर एरान वान–बिसाका र न्युक्यासल युनाइटेडका स्ट्राइकर योआने विस्सा फिफा विश्वकपका लागि प्रजातान्त्रिक गणतन्त्र कङ्गो (डीआर कङ्गो) को टोलीमा छानिएका छन् । कङ्गोका प्रशिक्षक सेबास्टियन देसाब्रेले आगामी विश्वकपका लागि घोषणा गरेको अन्तिम टोलीमा यी दुई प्रिमियर लिग स्टारहरूलाई समेटेका हुन् ।

क्रोयडनमा जन्मिएका २८ वर्षीय वान–बिसाकाले यसअघि इङ्गल्यान्डको यु–२१ टोलीबाट खेलिसकेका छन् भने सन् २०१९ मा इङ्गल्यान्डको सिनियर टोलीमा समेत परे पनि मैदान उत्रिने मौका पाएका थिएनन् । म्यानचेस्टर युनाइटेडका यी पूर्व फुल–ब्याकले अगस्ट २०२५ मा आफ्नो अन्तर्राष्ट्रिय आबद्धता परिवर्तन गर्दै डीआर कङ्गो रोजेका थिए र अहिलेसम्म ‘लियोपार्ड्स’ का लागि ९ क्याप जितिसकेका छन् ।