आईपीओ अघि नै मस्कको स्पेसएक्सले जुटायो ७५ अर्ब डलर

क्यालिफोर्निया । अमेरिकी अन्तरिक्ष तथा एआई कम्पनी स्पेसएक्सले शेयर बजारमा डेब्यू अघि नै ७५ अर्ब अमेरिकी डलर जुटाएको छ । शुक्रबार कम्पनी शेयर बजारमा सूचिकृत हुँदैछ । योसँगै स्पेशएक्स अमेरिकी इतिहासकै सबैभन्दा ठूलो आईपीओ हुने अपेक्षा गरिएको छ । अमेरिकी शेयर नियामकलाई बुझाएको फाइलिङमा कम्पनीले प्रतिकित्ता शेयर १३५ डलरमा बेच्न लागेको बताइएको छ ।

गत हप्ता कम्पनीले शेयर बजारमा कम्पनीको बजार पूँजीकरण १८ खर्ब डलर पुग्ने प्रक्षेपण गरेको थियो । यस्तो भयो भने स्पेसएक्सका संस्थापक तथा प्रमुख कार्यकारी अधिकृत एलन मस्क विश्वकै पहिलो ‘ट्रिलियनर’ (१० खर्ब डलरभन्दा बढीको सम्पत्ति भएका व्यक्ति) बन्नेछन् । उनी अहिले नै विश्वको सबैभन्दा धनी व्यक्ति हुन् ।