दलीय सहमति भए पनि पाएनन् मन्त्री चित्रकारले जिम्मेवारी

मकवानपुर । गत साउन २१ गते बागमती प्रदेशका बिना विभागीय मन्त्री रामकृष्ण चित्रकारको जिम्मेवारीका विषयमा दलहरुबिच सहमति जुट्यो । मन्त्री नियुक्त भएको ७७ दिनपछि चित्रकारलाई विभागीय जिम्मेवारी दिन मन्त्रालय विभाजन गर्ने सहमति भए पनि हालसम्म उक्त सहमतिले औपचारिकता पाउन सकेको छैन ।

दलीय सहमति अनुसार मन्त्री चित्रकारलाई उद्योग, सहकारी तथा सामान्य प्रशासन मन्त्रालयको जिम्मेवारी दिने सुनिश्चित भएको थियो । सहमति जुटेको ९ दिनसम्म पनि मुख्यमन्त्री शालिकराम जम्कट्टेलले मन्त्री चित्रकारको जिम्मेवारी तोकेका छैनन् ।