देशको परराष्ट्र नीतिलाई सन्तुलित बनाउनुपर्ने सांसदहरूको सुझाव

प्रतिनिधिसभामा आर्थिक वर्ष २०७९/०८० को विनियोजित विधेयकमाथि आज सांसदहरू प्रेम सुवाल, दुर्गा पौडेल, कृष्णभक्त पोखरेल, शेरबहादुर तामाङ र भीम रावलले मन्त्रालयगत खर्च कटौतीको प्रस्ताव प्रस्तुत गर्नुभयो ।

सहरी विकास मन्त्रालय, स्वास्थ्य तथा जनसङ्ख्या मन्त्रालय र राष्ट्रिय योजना आयोगको सचिवालय, प्रधानमन्त्री तथा मन्त्रिपरिषद्को कार्यालय, राष्ट्रपतिको कार्यालय एवं उपराष्ट्रपतिको कार्यालय अन्तर्गतको शीर्षकहरूमाथिको छलफलमा सांसदहरुले खर्च कटौतीको प्रस्ताव प्रस्तुत गर्दै सरकारी अस्पतालको सुधार गर्नुपर्ने, अस्पतालको शय्या र पूर्वाधार तथा गुणस्तरीय सेवा हुनुपर्ने, स्वास्थ्य उपचार सहज र सस्तो हुनुपर्ने, स्वास्थ्य बीमालाई व्यापारीकरण हुन दिन नहुने, गाजाको औषधीय गुणलाई वैधानिक बनाउनुपर्ने, नेपालको परराष्ट्र नीतिलाई सन्तुलित बनाउनुपर्ने सुझाव दिनुभयो ।