गर्मीमा राहत, लामखुुट्टे अलप

नेपालगन्ज : दिनप्रतिदिन तापक्रम बढ्दो छ। आगोझै पोल्ने गर्मी छ। शरीरबाट पसिनाका धारा झै बग्ने गर्छन्। गर्मीका कारण जनजीवन कष्टकर बन्दै गएको छ। तर यही चर्को गर्मीका कारण लामखुट्टेबाट भने नेपालगन्जवासीले मुक्ति पाएका छन्। सञ्जीवनी मेडिकल कलेज, नेपालगन्जका प्रशासन विभाग प्रमुख कुमार अधिकारी यतिबेला गर्मीबाट राहत पाएको बताउँछन्। उनको राहतको कारण भने गर्मी कम हुनु होइन, बरु लामखुट्टे हराउनु हो।

‘राति लामखुट्टेले टोकेर सुत्नै सकिँदैनथ्यो। बैठक कोठा होस् वा शयनकक्ष, किचेन होस् वा बाथरुम, घरभित्र र बाहिर जता पनि लामखुट्टेकै बिगबिगी थियो,’ अधिकारी भन्छन्, ‘अहिले त एउटा लामखुट्टे पनि देखिँदैन। गर्मीले अरू समस्या बढाए पनि लामखुट्टे भने लगभग सखाप पारेको छ।’