ढोरपाटनमा नियन्त्रणमा आउन थाल्यो दादुरा

बागलुङ । बागलुङको ढोरपाटनमा दादुरा सङ्क्रमितको सङ्ख्या घट्न थालेको छ । गत फागुन ८ गते ढोरपाटन नगरपालिका–७, ८ र ९ मा दादुरा सङ्क्रमण फैलिएको थियो । फागुन २९ गतेदेखि यही चैत २ गतेसम्म यस क्षेत्रका बालबालिका तथा किशोर किशोरीलाई खोप लगाएपछि सङ्क्रमितको सङ्ख्या घट्दै गएको हो ।

विश्व स्वास्थ्य सङ्गठन, प्रदेश जनस्वास्थ्य कार्यालय बागलुङ र स्थानीय तहका स्वास्थ्यकर्मीको टोलीले सङ्क्रमण नियन्त्रणका लागि प्रभावित क्षेत्रमा पुगेर अध्ययन गरेको थियो । खोप लगाएपछि दैनिक सङ्क्रमित हुनेको सङ्ख्या कम भएको प्रदेश जनस्वास्थ्य कार्यालय बागलुङका प्रमुख प्रवीण शर्माले जानकारी दिए ।