सन् २०२७ को क्रिकेट विश्वकपको मिति तय : १४ टोली भिड्ने, दक्षिण अफ्रिकाले धेरै खेल आयोजना गर्ने

काठमाडौँ । अन्तर्राष्ट्रिय क्रिकेट परिषद् (आईसीसी) ले सन् २०२७ मा आयोजना हुने पुरुष एकदिवसीय विश्वकप क्रिकेट प्रतियोगिताको अस्थायी खेल तालिका तय गरेको छ।

दक्षिण अफ्रिका, जिम्बाब्वे र नामिबियाले संयुक्त रूपमा आयोजना गर्ने यो विश्वकप सन् २०२७ को अक्टोबर ४ देखि नोभेम्बर २१ सम्म सञ्चालन गर्ने गरी क्यालेन्डरमा समावेश गरिएको छ। गत मे महिनामा अहमदाबादमा बसेको आईसीसी बोर्ड बैठकले यो मितिमा सहमति जनाएको हो भने यसको अन्तिम विस्तृत विवरण आगामी जुलाईमा एडिनबर्गमा हुने आईसीसीको वार्षिक साधारण सभा (एजीएम) बाट स्वीकृत गरिनेछ।