मेयर बालेन्द्रको ‘डोजडर आतंक’ विरुद्ध प्रदर्शन

काठमाडौं । काठमाडौं महानगरपालिकाका मेयर बालेन्द्र साहको डोजर आतंकविरुद्ध राजधानीवासी आन्दोलनमा उत्रिएका छन् । आइतबार उपत्यकाव्यापी सडक विस्तार पीडित संघर्ष समिति र स्थानीय विभिन्न संगठनहरूले माइतीघरमा प्रदर्शन गरेका थिए । नक्सापास गरी बनाइएका भवनलाई समेत डोजर लगाइने, सडक विस्तारको नाममा स्थानीयलाई उठिवास लगाउने, सडक बिस्तारको नाममा एकलौटी निर्णय गर्न नपाइनेलगायतका माग राखी ती संगठनहरूले सडक प्रदर्शन गरेका हुन् ।

साहलाई निर्वाचनमा जिताउन महत्वपूर्ण भूमिका खेलेका र निर्वाचित भएपछि सँगै हिँडेका सुमन सायमीलगायतको नेतृत्वमा सडकमा प्रदर्शन गरिएको थियो । ‘सडक बिस्तारको नाममा उठिवास गराउन पाइँदैन’ भन्ने प्ले कार्ड बोकेका सायमीले बालेन्द्र साहले एकलौटी रूपमा मनपरी निर्णय गरेको आरोप लगाउनुभएको थियो । उहाँले भन्नुभयो– ‘स्थानीयलगायत सडक बिस्तार पीडितले पटकपटक गरेको आग्रहको बेवास्ता गर्दै लगातार संरचना भत्काउन अघि सरेपछि मेयरविरुद्ध उपत्यकाबासी आन्दोलनमा उत्रिनुपरेको हो ।’