निजी क्षेत्रसँगको सहकार्यलाई संस्थागत, प्रभावकारी र विस्तार गर्नुपर्नेमा जोड

काठमाडौं । दिगो र समावेशी विकासका लागि निजी क्षेत्रसँगको सहकार्यलाई अझ संस्थागत, प्रभावकारी र विस्तार गर्नुपर्ने आवश्यकतामा जोड दिइएको छ । हेल्भेटास नेपाल र नेपाल उद्योग परिसंघ (सीएनआई)को संयुक्त आयोजनामा सम्पन्न ‘समावेशी विकासका लागि निजी क्षेत्रको संलग्नता’ विषयक क्षेत्रीय सम्मेलनले उक्त कुरामा जोड दिएको हो ।

सम्मेलनले कृत्रिम बुद्धिमत्ता (एआई), तीव्र श्रम गतिशीलता तथा जलवायु परिवर्तनका कारण विश्वव्यापी विकासको स्वरूप बदलिइरहेको अवस्थामा निजी क्षेत्रलाई केवल आर्थिक साझेदार नभई परिवर्तनको प्रमुख संवाहकका रूपमा स्थापित गर्नुपर्ने सन्देश दिएको छ ।

‘व्यावसायिक प्रोत्साहन र विकासका परिणामबीचको संगम’ भन्ने मूल नारासहित आयोजित सम्मेलनमा नेपालसहित दक्षिण एसियाका विभिन्न मुलुकहरूबाट करिब १५० जना नीति निर्माता, व्यवसायी, विकास साझेदार, वित्तीय संस्था, शिक्षाविद्, उद्यमी तथा उद्योग क्षेत्रका प्रतिनिधिहरू सहभागी भएका थिए । सम्मेलनमा सीप विकास, उद्यमशीलता प्रवर्द्धन, रोजगारी सिर्जना तथा दिगो आर्थिक वृद्धिमा निजी क्षेत्रको भूमिकाबारे विस्तृत छलफल भएको थियो ।

कार्यक्रमको उद्घाटन गर्दै नेपाल उद्योग परिसंघका अध्यक्ष वीरेन्द्रराज पाण्डेले बदलिँदो आर्थिक परिवेशमा सरकार, निजी क्षेत्र, श्रमिक, समुदाय तथा विकास साझेदारबीचको सहकार्य अझ बलियो बनाउनुपर्ने आवश्यकता औँल्याए । उनले भविष्यको विकास मोडेल विश्वास, सहकार्य र साझा जिम्मेवारीमा आधारित हुनुपर्ने बताउँदै नेपालले आर्थिक प्रतिस्पर्धात्मकता र रोजगारीका चुनौतीहरू समाधान गर्न सामूहिक प्रयास अपरिहार्य रहेको धारणा व्यक्त गरे ।

पूर्वअर्थसचिव तथा पूर्वमन्त्री रामेश्वर खनालले निजी क्षेत्रलाई नेपालको आर्थिक विकासको प्रमुख चालक शक्ति भन्दै लगानी, नवप्रवर्तन, उत्पादकत्व वृद्धि र रोजगारी सिर्जनामा यसको निर्णायक भूमिका रहेको उल्लेख गरे । उनले व्यवसायीहरूले आत्मविश्वासका साथ लगानी गर्न सक्ने वातावरण निर्माण गर्न सरकार नियन्त्रकभन्दा सहजीकरणकर्ताको भूमिकामा देखिनुपर्ने आवश्यकता औँल्याए ।

हेल्भेटासका एसिया महादेशीय संयोजक डा. जुएर्ग मर्जले निजी क्षेत्रको संलग्नता केवल स्रोत परिचालनको विषय नभई साझा मूल्य सिर्जना गर्ने रणनीतिक साझेदारी भएको बताए ।

#निजी क्षेत्र