कोरला नाकाबाट जफत इभी गाडीले व्यापारिक घरानालाई तनाव, गाडी छुटाउन दौडधुपमा यमुना श्रेष्ठ

काठमाडौं– मुस्ताङको कोरला नाकाबाट जफत गरिएका ७७४ इभी गाडीमा नेपालका व्यापारिक घरानादेखि सरकारी अधिकारीहरू समेत तानिने देखिएको छ । विवाइडीको आधिकारिक विक्रेता साइमेक्स इन्कले बजेटको पूर्व सन्ध्यामा नेपाल भित्र्याएको इभी गाडी ल्याउन सरकारीदेखि भन्सार अधिकृतसम्मको साँठगाँठ देखिएको भन्दै छानबिन अघि बढाइएको बताइएको छ ।

सरकारले आर्थिक वर्ष २०८३/८४ को बजेटमा इभी गाडीमा किलोवाटको आधारमा नभई मूल्यका आधारमा भन्सार लगाउने व्यवस्था गर्ने सूचना पाएपछि बीवाइडीको आधिकारिक विक्रेता साइमेक्स इन्कले बजेट सार्वजनिक हुनु अगावै उक्त गाडी नेपाल भित्र्याएको थियो । अर्थ मन्त्रालयकै उच्च तहबाट करको सूचना पाएपछि साइमेक्स इन्कले गाडी बजेट सार्वजनिक हुनु अगावै सीमा नाका पार गराएको थियो ।