राजनीतिक निष्ठाका सुवास

निधनपछि व्यक्तिका अवगुण र कमजोरी बिर्सेर गुणमात्रै सम्झने नेपाली समाजको चरित्र हो। राजनीतिकर्मी सुवास नेम्बाङका हकमा भने त्यो चरित्रमात्रै प्रकट भएको मान्न सकिन्न। उनी कमजोरीबिनाका मानिस त होइनन्, तर धेरै गुणले युक्त राजनीतिकर्मी अवश्य हुन्।

दलीय राजनीति भएको मुलुकमा एउटा पार्टीको नेता भएर सबै दलका नेता र समर्थक तथा आमजनताको पनि प्रिय हुन सक्नु भनेको दुर्लभ हो। हो, त्यही विरलाकोटी नेता थिए सुवास नेम्बाङ। जसको मंगलबार बिहान भएको अप्रत्याशित निधनबाट राजनीतिक वृत्तमात्रै होइन, देशको सम्पूर्ण सचेत वर्ग मर्माहत भयो। उनी कतिसम्म सर्वप्रिय थिए भन्ने दृष्टान्त उनी चार/चार पटक सभामुख/अध्यक्ष हुनु पर्याप्त हो। २०६३ सालमा पुनस्र्थापित संसद्देखि संविधानसभासम्म गरी कहिले सभामुख त कहिले अध्यक्षको जिम्मेवारी पाउँदा उनी सबै दलबाट स्वीकार्य भएकैले सर्वसम्मत रूपमा चुनिएका थिए।