सरकार छ भन्ने आभास देऊ

प्रधानमन्त्री पुष्पकमल दाहाल (प्रचण्ड) को भनाइ र गराइमा भिन्नता पाइन्छ । उहाँका हरेक दिनका भाषणहरु सुन्ने हो भने मुलुक उन्नत हुन कुनै समय नै लाग्ने छैन तर उहाँको काम गराइलाई हेर्ने हो भने देश उन्नतिको बाटोतर्फ लम्केला भन्न सकिँदैन । देशको कार्यकारी प्रमुखको दैनिकी देश निर्माणका लागि हरेक दिन विज्ञसँगको छलफलमा व्यस्त हुनुपर्ने थियो तर उहाँ कार्यकर्ता र उद्योगी तथा व्यापारी रिझाउन सामान्य कार्यक्रमको उद्घाटन गर्दै आफ्नो समय खेर फाल्ने काम गर्दै आउनुभएको छ ।

पछिल्लो समय उहाँले स्कुलको स्वर्ण जयन्तीको उद्घाटनदेखि निजी क्षेत्रले बनाएको केबलकार उद्घाटन गर्दै आफ्नो समय व्यतीत गर्दै आउनुभएको छ । चौतर्फीरुपमा उहाँको पार्टी घेराबन्दीमा पर्दै गएको छ । मुलुकका विकास निर्माण ओझेलमा पर्न थालेका छन् तर उहाँलाई यस्ता चिन्ताले छुन सकेको देखिँदैन । पछिल्लो समय लोकतन्त्रमाथि धावा बोल्ने शक्तिहरु जुर्मुराउन थालेका छन् । अहिलेको व्यवस्थाले नेपाली जनताको हित र उन्नति गर्न नसक्ने भन्दै उनीहरु व्यवस्थाको विरुद्ध लाग्दा पनि प्रधानमन्त्री प्रचण्डलाई भने रिबन काट्ने मोहले छोड्न सकेको देखिँदैन ।