सल्लाह छ, सेवा छैन

विराटनगर। इलामको सन्दकपुर गाउँपालिका-३, सुलुबुङकी ४९ वर्षीया गोमादेवी पौडेलको दैनिकी अचेल कष्टकर छ। मेरुदण्डको हड्डी खिएर नशा च्यापिएपछि उनलाई उठबस गर्नै सकस हुन्छ। एक महिनाअघि विराटनगरस्थित नोबेल अस्पतालमा स्वास्थ्य जाँच गराउँदा चिकित्सकले उनलाई एउटै उपाय सिफारिस गरे–नियमित फिजियोथेरापी।

विराटनगरमा केही दिन थेरापी गराएर घर फर्किएकी गोमादेवी २९ जेठको दिउँसो निकै आशावादी भएर जिल्ला अस्पताल इलाम पुगिन्। घरबाट झन्डै एक घण्टाको बाटो पार गरेर अस्पताल पुग्दा उनले सुनिन्, “अस्पतालमा फिजियोथेरापिस्ट त हुनुहुन्छ, तर मेसिन छैन।”